APUNTES CRÍTICOS SOBRE MARXISMU

Toi d’alcuerdu colo que diz Cuetu. Y toi d’alcuerdu contigo en que ún ye marxista o non marxista por elección personal e individual. D’alcuerdu a la elección qu’ún fai (por razones esistenciales podríamos decir) pues les coses vense con un prisma u otru. Lo que pasa que la realidá pon a ún a prueba y les coses que teníen validez nun momento de la vida dexen de teneles n’otru. A min pasóme col marxismu. Col tiempo daste cuenta qu’aquello que te paecía tan racional y tan lóxico y tan necesario, dexa de selo. Yo dime cuenta que lo que falla nel marxismo fundamentalmente ye lo qu’espera del ser humanu. Espera qu’el ser humanu seya racional y solidariu y faga una sociedá llibre d’opresiones y explotaciones. Esi optimismo fonderu del marxismo ye propiu del sieglu XIX cuando tovía se veía la posibilidá racional y romántica d’un ser humanu nuevu que camudara la Hestoria. Pero llueu daste cuenta que el ser humanu ye munches coses más qu’un ser racional. Ye tou un espectro de posibilidaes, pero lo que domina n’él ye más l’egoismu, l’interés personal; vencer mieos, dexáse llevar por obsesiones, proyectar deseos n’utopies o falses esperances, etc. Eso ye lo que más predomina y domina nel ser humanu. Y, con esti ser humanu real, ye imposible cualquier utopía o idealismo. Hai qu’abstraer muncho del ser humanu pa crear un proyectu idealista del tipu que seya.

Y eso foi lo que pasó col marxismo. Abstrae del ser humanu lo que-y convien. Abstrae de la realidá to a quello que-y estorba pa que’l modelu encaxe. Y los motivos son nobles y buenos: non se pue tar paráu viendo mases de xente sometíes a una explotación brutal nes fábriques y mines, etc.. Hai que correxilo, hai que comprender esa realidá pa camudala y que l’home seya más feliz. Y El Capital parte d’esa realidá y d’esa posibilidá. L’análisis del valor queda reducío al trabayu y l’acumulación de capital a la plusvalía. Ehí ta la clave. Ye una cuestión mecánica y obxetiva. A partir d’ehí construyes tou un proyectu políticu “racional” y “científicu” de lliberación del home. Ellabores categorías y conceptos que van emanando d’una forma aparentemente lóxica y perprestosa. Algunos puen ser ricos en cuanto qu’espliquen coses en clave de dialéctica qu’antes nadie prestare atención: mou de producción esclavista, feudal, capitalista, y; llueu por negación de la negación: el socialismo y el comunismo. La razón del sofrimientu humanu ya se pue comprender nel mou de produción capitalista y entós vese l’alienación proletaria que produz aquello que lleu pasa a ser valor de cambiu (en contraste col ideal valor d’usu) y lu deshumaniza hasta el mou de que la so fuerza de trabayu ye ella una mesma mercancía, etc..Y entós si la burguesía “desterritorizó” el mou de producción feudal (como diría Deleuze) y impuso baxo un determinismo dialécticu, el so código de producción (mou de producción, testu económicu, xurídicu, nueva legalidá, nueva recodificación de la realidá), pues el proletariáu va facer lo mesmo cola burguesía y crear el socialismo/comunismo. El esquema ye perprestósu. Tan perprestosa como yera la dialéctica de Hegel nel so día. Too encaxaba. Too yera tan racional como universalmente abarcable y aplicable. El marxismo tien éxito como ideología de lliberación y revolución porque el so atractivu ye inmensu nuna época histórica de cambios, optimismo y posibilidaes. ¿Quién se podía resistir a ella?

Pero llueu ye la realidá la que va desmintiendo el esquema. El devenir hestóricu ye muncho más complexu y suele despreciar la dialéctica racionalista. El valor nun ye sólo el trabayu acumulaú na mercancía. Por poner un exemplu sencillu: una botella vinu de Marqués de Sicilia pue tener les mesmes hores de trabayu acumuláu qu’un vinu peleón, pero factores subjetivos de tastu, imaxen, exquisitez, etc..faen qu’un vinu tenga más valor qu’otru. Una película bona que a ti te gusta pue tener el mesmu trabayu acumuláu d’otra mala que non te gusta, pero tu y miles como tú elexís la que vos gusta añadiendo valor a la primera. En fin, el valor lleva consigo elementos subjetivos impredecibles que´l mercáu llueu va regulando. Efectivamente, el ser humanu ye continxente, e impredecible. Y esa realidá continente e impredecible ye la que fai qu’el marxismo fracase y derive en los socialismos reales de ineficacia económica, de represión brutal y asesinatos en masa; per un llau, pero per otru en nueves escueles y sectes que tratarán d’apañar lo inapagable de la mesma manera que’l cristianismo busca la iglesia verdadera que se desvía por “errores” y coses pol estilu. Que hoy día el marxismo siga teniendo encantu después de lo esperimentao y los desengaños y les sectes y les teorizaciones ridícules de xente como Negri, prueba lo necesitaos que tamos de significáu, de aliviar tensiones intelectuales y pruyimientos idealistas. La realidá ye lo que ye y en la mesma vida diaria vemos los egoísmos de compañeros de trabayu, la irracionalidá en que se mueve (y nos movemos) muncha xente porque somos lo que somos. La historia camuda, pero nuncamuda d’alcuerdu a los esquemes que nos facemos. La historia ye más un devenir que una dialéctica teleolóxica.

Entós les categorías marxistes de mou de producción, de valor, d’alienación, de infraestructura y superestructura; tan ya superaos nel sentíu de que, o queden obsoletos por inservibles, o, per otru llau recodifiquense con otros usos diferentes a les orixinales. Mou de producción capitalista pue seguir teniendo un usu estendíu y aceptáu güei, pero el conceptu en sí ya nun lleva la carga dialéctica del marxismo clásicu. ¿Quier decir esto que hai qu’abandonar la preocupación por facer la sociedá más digna y más decente y llibre pa toos? Non. Yo creo que lo que hai qu’abandonar son les teoríes falses, idealizaes y totalizantes sol ser humanu y la realidá. Y el marxismo ye una d’elles.